> UOG Events home page > UOG News & Announcements home page

Poetry Recitation/Rinisadan Po'ema

CHamoru Language Competition


POETRY RESITATION/RINISÅDAN PO’EMA 

Po’ema/Poem

Inacha’igen Fino’ CHamoru 2015

 

Iyo-mu, Iyo-ku, Iyo-ta

Tinige’ Ray Barcinas, September 2014

 

I fino' CHamoru sa' kuñådon kostumbre

Guiya, lokkue’, nånan i bidan Mari’ånas

I ti umatitútuyi pagåt-ña, guiya dimålas

I fino' CHamoru sa' ga'chong lina'la'

Guiya i primon tiningo'.

 

Håyi ti numa'mababa titanos-ña, guiya malingu

I fino' CHamoru sa' påtgon saina

Tåtkomu che'lu-ta

Ni numisisita hit atdet

Maila', nihi ta ayuda.

 

O, fino' CHamoru, nobian i penga'

Láguse', asagua i kottura

Ensinayao dumeskånsa gi i kurason-ta

Tai hinekkok na agupa'

Adahi nai sa' iyo-mu.

 

Cha'-mu pópo'lo gi chinanda

Na’fa'cho'cho' gi i inadingan

Lålai gi i halom kånta

Pulan kulan neni

Guaiya kulan nåna.

 

Onra kulan tåta

Po'lo komu gi guinaguan mampos gi fanfa'pusan lina'lå'-ta

Sarampion yan betguelas

Tátatsi yan pípino'

I lengguåhen CHamoru yan taiguenao mohon.

 

As Mari’ånas tåya' ti u fífino'

Lå'yeyi u ta fanmetgot

Ya mungnga na u machomma'

I fino' CHamoru sa’ iyo-mu, iyo-ku, yan iyo-ta!

 

 

 


 

Lalai/Chant

 

Inachá’igen Fino’CHamoru 2015

 

Imåhen i Taotao-ta

Tinige’ Siñot Brian Terlaje yan Siñot Raymond Lujan, 2014

 

Fine’nena na Betso:

Fresko i aire

Duru i manglo’

Humuyong i atdao

Chumi’op i ha’åni

An poddong i ichan papa’ gi i tano’

Manmagof i taotao, bunitu i ha’åni.

 

Koru:  

Humuyong i hilét i isan i langet

Yan i paluma kumǻkanta gi i trongko (trengko)

Mamflores i tåsi

Para u fa’nu’i i lina’la’ i taotao-ta

Para i manmå’pos, på’go yan i manmámaila’.

 

Mina’dos na Betso: 

I mapagåhes tumåmpe i tano’

Ma nå’i sósombra

I nina’en siha

Sen låmlam suleras, gof ma’lak yan gåtbo

Prumeti Mañaina

Para i Taotao Tåno’.

 

Koru:  

Humuyong i hilét i isan i langet

Yan i paluma kumǻkanta gi i trongko (trengko)

Mamflores i tåsi

Para u fa’nu’i i lina’la’ i taotao-ta

Para i manmå’pos, på’go yan i manmámaila’.

 

Tollai: 

Guello yan Guella, kao siña ham manmaloffan

Sa’ i famagu’on-ta fuetsan i kotturå-ta (ketturå-ta)

O Ásaina, O Anite ginen I mås geftao na kannai-mu!

 

Koru:  

Humuyong i hilét i isan i langet

Yan i paluma kumǻkanta gi i trongko (trengko)

Mamflores i tano’

Para u fa’nu’i i lina’la’ i taotao-ta

Para i manmå’pos, på’go yan i manmámaila’.

 

Úttemo:        

Para i manmå’pos, på’go yan i manmámaila’.