CHamoru Language Competition

Anthems & Songs

CHamoru Language Competition


Anthems and Songs / Korun Famagu'on

CHamoru Language Competition

Korun Famagu'on

Children’s Choir/Koron Famagu’on Selection
Inachá’igen Fino’ CHamoru 2020

 

I HILA’ NÅNA U SU’ON HIT MO’NA II (K-2)
(Kåntan CHamorita)
By Sinot Joseph D. Franquez

Click here to play song
 

BETSO 1
Desdiki mafañagu-ta
Guiya mo’na ma’estrå-ta
Ya i sustånsian i fino’-ta
Umesgaihon lina’lå’-ta


BETSO 2
Ai ya håfa na minappot
Ti ha hulat nai pumula’
Yanggen tåya’ siña umoppe
Faisen ha’ yon li’e’ sa’ ha tungo’ ha’


BETSO 3
Un manåda na metgråsia
Tai ineteson na ånima
U taiguihi na ta tuna
Yan taiguenao ta abiba


BETSO 4
Ya i ánte’ti lago’-ña
Put i fehman mangastiga
Mama’chi’op guainaiya-ña
Chetton metton gi anti-ta

BETSO 5
Guiya i tronkon familia
Yan minetgot i hagå’-ta
I fotsudu na sineyo’
Gi halom i kotturå-ta


BETSO 6
I linachi ha dispensa
Ya i minakkat sa’ ha kåtga
Solo guiya ta angokko
Todu i tiempo gui’ ta båtga


BETSO 7
I kannai-ña hit muna’chocho
Konsuelu-ña muna’håspok
I pagåt-ña ni anti-ta
Muna’sugat ya ti u måhlok


BETSO 8
Pues ta hasso gi che’cho’-ta
Tai hinekkok u ta onra
Ya ta hongge hila’ nåna
Ayu u su’on hit mo’na (3X)

Children’s Choir/Koron Famagu’on Selection PDF
I HILA' NANA U SU'ON HIT MO'NA II (K-2).pdf


 


I HILA’ NÅNA U SU’ON HIT MO’NA I (3-5)
(Tunådan Kåntan CHamorita)
By Sinot Joseph D. Franquez

Click here to play song

BETSO 1
I hila’ nåna sa’ inina
Taiguihi i pilan ni sen ma’lak
Esgaihon-ta ni hinilat
I hinemhom i chatanmak


BETSO 2
I mannginge’ yan i ika
I chenchule’ yan limosna
Inafa’maolek yan inagofli’e
Gineflamen-ta siha ni ta onra


BETSO 3
I fandånggo yan fiesta
Kompliåños yan baotismo
Gi nobena yan lisåyu
I respetu siempre listo


BETSO 4
Gi hila’ nåna na ta eyak
I dichukichu na karera
Para u guaha minagåhet
Gi katkuera na manera

BETSO 5
Gi dinanche na pinekkat
I hila’ nåna na ta eyak
I noniyon na tinemtom
Gi famagu’on-ña na sinedda’


BETSO 6
Ta gogue yan ta adahi
I hila’ nåna sasague-ta
I hila’ nåna gi kinahulo’
I pengngå’-ta yan hale’-ta


BETSO 7
I hila’ nåna tituhon-ña
Nina’huyong-ña i fino’-ta
Håftaimanu ta fanbasnak
I hila’ nåna u su’on hit mo’na


BETSO 8
I hila’ nåna tituhon-ña
Håftaimanu ta fanbasnak
Nina’huyong-ña i fino’-ta
I hila’ nåna u su’on hit mo’na (3X)

Children’s Choir/Koron Famagu’on Selection PDF
I HILA' NÅNA U SU'ON HIT MO'NA 1 (3-5).pdf


 

Lålai

Inachá’igen i Fino’ CHamoru 2020
Tinige’ Michael Lujan Bevacqua
I Fino’ CHamoru: I Hila’ i Mañaina

Masångan na påtte (spoken)

Mañainå-ta, Mañe’lu-hu
Atan hit på’go
Makkat i lina’la’-ta gi mismo tano’-ta
Mantaiguinife hit na taotao
Mantaiputi’on hit na taotao
Kao malingu todu tinangga?
Ilek-hu åhe’!
Ilek-måmi åhe’!

Primet na Betsu
Homhom i langhet
Båba i sinat siha
Påkyon tinilaika - gi oriyå-ta

Mångge i pilan (ayugue!)
Mångge i puti’on siha (ayugue!)
I mañainå-ta umi’ina – i chalan mo’na!

Koru (Chorus)
I hila’ i saina (Ta prutehi)
I tiningo’ i mañaina (Ta adahi)
I minesngon i manmofo’na (Ta susteni)
Segundo na Betsu
Gi hanom tiempo siha
Chaochaochao i tasi
Kao manabak hit? – ilek-ta åhe’
Mangginiha hit mo’na (Fo’na! Fo’na!)
Ni hemplon i mañaina (I manmofo’na!)
Ta tungo’ i chalan – kao para ta tattiyi?
Koru (Chorus)
I hila’ i saina (Ta prutehi)
I tiningo’ i mañaina (Ta adahi)
I minesngon i manmofo’na (Ta susteni)
Tetset na Betsu
Manggaige hit gi sakman
I sakman i taotao-ta
Taiamanu para ta su’on – su’on gui’ mo’na!
Ta usa i tiningo’ (i mañaina)
Komo un tu’los (tu’los i taotao)
Ya ini na tinemtom – u su’on hit mo’na!
Masångan na påtte (spoken)
Mañainå-ta, Mañe’lu-hu
Atan hit på’go
Hunggan makkat i lina’la’-ta gi mismo tano’-ta
Lao anggen ta na’lå’la’ i kotturå-ta
Anggen ta gu’ot i fino’-ta
Siempre mangaiguinife hit na taotao ta’lo
Mangaiputi’on hit na taotao ta’lo
Ya gaitinangga hit ta’lo put i tiempon mamaila

Lålai/Chant Selection
inachaigen_fino_chamoru_2020_lalai_selection.pdf