Poetry Recitation / Rinisadan Po'ema

PO’EMA INACHA’IGEN 2023
Tinige’ Siñora Soledad Cabrera yan Siñora Teresita Flores

Gi Minenhalom i Taotao Tåno’ gi Inabiban Hinemlo’ yan Gråsia

Betso Unu
Måloffan meggai chinatsaga, tinilaika, triniste ya meggai guinifi para
minagof ha’åni.Mandanña’ i taotao tåno’. Manakuentusi, manago’te
kånnai. Måtto i mina’lak, ginen i guinaiya, respetu yan tinemtom.
Fanmagof, fanmagof todos taotao tåno’, ta nå’i gråsia sa’ mumanana
i hemhom. Guaha kinatma, trinankilu yan minagof, manali’e’ hit ta’lo.
Biba! Biba!

Betso Dos
Maila ta gopte hinemlo’ på’go sa’ måtto para hågu yan guåhu, para hita!
Meggai chinatsaga, minalångu yan pinadesi lao ta ngaha’ hulo’ i Saina,
ta gågao i ayudu-ña, ti ta fanmaleffa na gaige para hita.
Sa’ ennao kostumbren-ta. Ta abiba i hinemlo’ yan i maolek gråsia
ni’ måfatto, gi i fino’ ginen i kurason-ta.
Biba! Biba!

Betso Tres
Mungnga na ta na’falingu i ånimu put i chinatsaga, ta fanmetgot sa’ tåya’
pinekkat sin fegge’. U guaha diniseha, inangokko yan minetgot giya hita.
Ta na’ oppan, ta na’hongga i hinengge, i sinente-ta, i guinaiya-ta, hita ni’ manaotao tåno’! Iyo-ta I Fino’CHamoru nihi ta abiba ya ta silebra i hinemlo’ yan gråsia ginen i minenhalom-ta.
Gopte, gopte taotao tåno’, sa’ manlibre hit gi chinatsaga.
Biba! Biba!

Betso Kuåtro
Annok inetnon familia, yan mangga’chong. Lumamaolek i ikonumiha. Mandanña
hit gi eskuela, gi che’cho’ yan gi uriya siha. Ta sigi ha’ tumulos mo’na, ya hunggan
meggai mås para ta fakcha’i yan ta fåna’ gi hinanao-ta; minaolek, chinatasaga,
minagof yan pinadesi, ya maseha guaha na muma’iot yan mumahatot i chalan,
lao  yan guaha dinanña’ gi minenhalom i taotao tåno’ siha, u guaha inabiba gi i
hinemlo’ yan gråsia.
Biba! Biba!

Download the PDF version Po'ema Inacha'igen 2023 here.